梁振英約見 大嚿毓民唔睬

【明報專訊】候任特首梁振英近來密密約見各黨派，早前人民力量立法會議員陳偉業（大嚿）同黃毓民獲候任特首辦邀請，同勞聯李鳳英及金融界議員李國寶一齊見CY。不過大嚿同毓民噚日表明唔會同CY會面，話CY係小圈子選舉產生，冇民意授權，又話CY邀請各黨派議員會面，係師承中共嘅「統戰伎倆」，唔會咁易中計！

稱「統戰伎倆」唔中計
大嚿批評，CY前日未上任就講明出年私家醫院應暫停收雙非孕婦，係「亂點江山」，而家CY猛見政黨代表，猶如「利用議員幫自己創造民望」。毓民譴責CY不理終院判決，唔畀雙非嬰兒居港權，只係想提升民望，危害現屆政府管治。

噚日經濟動力同專業會議就分別同CY見面，挺唐英年嘅經濟動力林健鋒同CY講支援中小企同釋放土地嘅政策時，不忘叫CY唔好咁民粹，唔好剩係派錢，面對歐債危機，政府應該居安思危。專業會議劉秀成就話，主要同CY講到房屋規劃同埋長者住屋問題，CY有即場寫低佢哋嘅意見，但就冇講到有咩建議一定會跟從。

明報 18-4-2012